నాగార్జున కథానాయకుడుగా నటించిన గ్రీకువీరుడు చిత్రానికి సెన్సార్‌వారు యు/ఎ సర్ట్ఫికెట్ మంజూరు చేశారు. కామాక్షి మూవీస్ పతాకంపై గతంలో అల్లరి అల్లుడు, సీతారామరాజు, నేనున్నాను, కింగ్ వంటి సూపర్‌హిట్ చిత్రాలను అందించిన నిర్మాత డి.శివప్రసాదరెడ్డి, కె.దశరథ్ దర్శకత్వంలో ఈ చిత్రాన్ని నిర్మించారు. అన్ని కార్యక్రమాలు పూర్తిచేసుకుని ఈ సినిమా మే 4న విడుదలకు సిద్ధమైంది. ఈ సందర్భంగా నిర్మాత మాట్లాడుతూ ఇటీవల విడుదలైన పాటలకు, థమన్ అందించిన సంగీతానికి మంచి ఆదరణ లభిస్తోందని, త్వరలోనే హెక్సా ప్లాటినమ్ డిస్క్ వేడుకను జరపనున్నామని, వేసవి కానుకగా నాగార్జున అభిమానులకోసం అన్ని అంశాలతో ఈ చిత్రం రూపొందిందని, తమ సంస్థలో వస్తున్న మరో సూపర్‌హిట్ సినిమా ఇదని తెలిపారు. నయనతార, మీరాచోప్రా కథానాయికలుగా నటించిన ఈ సినిమా దశరథ్ గత చిత్రాలకన్నా భిన్నంగా వుంటుందని, ఫ్యామిలీ ఓరియంటెడ్ సినిమాగా ప్రేక్షకులకు నచ్చుతుందని ఆయన తెలిపారు. కోట శ్రీనివాసరావు, కె.విశ్వనాథ్, బ్రహ్మానందం, శరత్‌బాబు, నాగబాబు, ఎమ్మెస్ నారాయణ, ధర్మవరపు సుబ్రహ్మణ్యం, అలీ, వేణుమాధవ్, రఘుబాబు, కాశీవిశ్వనాథ్, వెనె్నల కిషోర్, నాగినీడు, సుప్రీత్, అశోక్‌కుమార్, భరత్‌రెడ్డి, సంజయ్‌స్వరూప్, తా.రమేష్, సారికా రామచంద్రరావు, గీతాంజలి, సుధ, జయలక్ష్మి, జయవాణి, లహరి, ఇందుఆనంద్ తదితరులు నటిస్తున్న చిత్రానికి సంగీతం: థమన్ ఎస్.ఎస్, కెమెరా: అనీల్‌భండారి, ఆర్ట్: రవీందర్, ఎడిటింగ్: మార్తాండ్ కె.వెంకటేష్, నిర్మాత: డి.శివప్రసాదరెడ్డి, కథ, మాటలు, దర్శకత్వం: కె.దశరథ్.