నేడు అపురూప అవార్డుల ప్రదానం

హైదరాబాద్, మే 11: సాహిత్య, సాంస్కృతిక రంగాలకు చెందిన పలువురు ప్రముఖ మహిళలకు ఆదివారం ‘అపురూప అవార్డ్స్-2013’ను ప్రదానం చేయనున్నారు. అమృతలత జీవన సాఫల్య పురస్కారంను డాక్టర్ సి ఆనందారామం, పోల్కంపల్లి శాంతాదేవిలకు బహూకరించనున్నారు. అపూరూప అవార్డుల బహూకరణ కార్యక్రమానికి అక్కినేని నాగేశ్వరరావు ముఖ్య అతిథిగా హాజరవుతారని ఆ సంస్ధ వ్యవస్థాపకురాలు, రచయిత్రి నెల్లుట్ల రమాదేవి తెలిపారు. పద్మశ్రీ డాక్టర్ శోభానాయుడు (నృత్యం) యస్. వాణిదేవి (చిత్రలేఖనం), నిత్య సంతోషిణి (సంగీతం) విజయదుర్గ (వ్యాఖ్యానం) కొండవీటి సత్యవతి (మహిళాభ్యుదయం) ఆంధ్రభూమి వీక్లీ అసిస్టెంట్ ఎడిటర్ ఎ.ఎస్. లక్ష్మి (జర్నలిజం) కొండేపూడి నిర్మల (కవిత్వం) కథా రచన (జాజుల గౌరి)లకు అవార్డులు అందజేస్తారు. విశిష్ట అతిథిగా తొలి సినీ నేపథ్య గాయని శ్రీమతి రావుబాలసరస్వతీ దేవి హాజరవుతారు. శ్రీ విజయ్ గ్రూప్ ఆఫ్ ఎడ్యుకేషనల్ ఇన్‌స్టిట్యూట్ చైర్‌పర్సన్ అమృతలత అవార్డులను బహూకరిస్తారు. జూబ్లీహిల్స్‌లోని జూబ్లీక్లబ్‌లో ఉదయం 10.30 నుంచి అవార్డుల బహూకరణ కార్యక్రమం జరుగుతుంది. అనంతరం సాంస్కృతిక కార్యక్రమాలు ఏర్పాటు చేశారు.