బుచ్చిరెడ్డిపాళెం, జూలై 14 : బుచ్చిరెడ్డిపాళెం మండలంలోని పెనుబల్లి గ్రామంలో ఇంకా ఉద్రిక్త పరిస్థితి నెలకొంది. గ్రామంలో పొలీసులు ఆదివారం పికెట్ ఏర్పాటుచేశారు. కమ్యూనిస్టేతరులు స్థానిక ఎన్నికల్లో పోటీ చేయడాన్ని జీర్ణించుకోలేక వైఎస్‌ఆర్ సిపి, బిజెపి మద్దతుతో నామినేషన్ వేయబోయిన ముగ్గురు వార్డుసభ్యుల అభ్యర్థులపై శనివారం కమ్యూనిస్టు నేతలు దాడిచేసి వారిని కిడ్నాప్ చేశారు. అలాగే వారికి అండగా నిలిచిన వైఎస్‌ఆర్ సిపి, బిజెపికి చెందిన ఇద్దరు నేతలపై దాడిచేశారు. దీంతో పెనుబల్లి గ్రామంలో ఉద్రిక్తత నెలకొంది. శాంతిభద్రతలకు ఆటంకం కలుగకుండా పోలీసు పికెట్ ఏర్పాటుచేశారు. దాడికి పాల్పడ్డారని ఆరోపణలు ఎదుర్కొంటున్న వారు పరారీలో ఉన్నారు. ఏ క్షణంలో ఏమి జరుగుతుందోనని గ్రామస్థులు భయాందోళనలో ఉన్నారు. ఇదిలా ఉండగా కిడ్నాప్ కాబడ్డారని చెబుతున్న వారి కుటుంబ సభ్యులు తమకు ఎన్నికలు వద్దని, కుటుంబ సభ్యులు క్షేమంగా తిరిగి వస్తే చాలని కోరుకుంటున్నారు.
ఇద్దరు అరెస్ట్
వైఎస్‌ఆర్ సిపి, బిజెపి నేతలపై దాడికి పాల్పడ్డ సిపిఎంకు చెందిన సుబ్రమణ్యం, శివశంకర్ అనే ఇద్దరు వ్యక్తులను ఆదివారం అరెస్ట్ చేసినట్లు ఎస్సై శ్రీనివాసరావు తెలిపారు. ప్రధాన నిందితునిగా చెబుతున్న గురునాధం పరారీలో ఉన్నట్లు ఆయన తెలిపారు.
అడ్డగుండాల గ్రామస్థుల ఆందోళన
తడ, జూలై 14: మండల పరిధిలోని అండగుండాల గ్రామానికి చెందిన ఇద్దరు గ్రామ పెద్దలను తడ పోలీసులు విచారణ నిమిత్తం అదుపులోకి తీసుకోవడంతో అండగుండాల గ్రామస్థులు ఆదివారం పోలీస్‌స్టేషన్ ఎదుట ఆందోళన నిర్వహించారు. అండగుండాల గ్రామంలో సర్పంచ్ ఏకగ్రీవం విషయమై కారికాటి సుబ్రహ్మణ్యం ఆత్మహత్యా యత్నానికి పాల్పడడంతో ఆ విషయంపై తడ పోలీసులు ఆ గ్రామ పెద్దలిద్దరినీ అరెస్ట్ చేసి పోలీస్‌స్టేషన్‌కు తీసుకువెళ్లారు. ఈ సందర్భంగా ఆ గ్రామ ప్రజలు తడ పోలీస్ స్టేషన్‌కు చేరుకొని అన్యాయంగా గ్రామ పెద్దలను అరెస్ట్ చేశారంటూ ఆందోళన నిర్వహించారు. గ్రామంలో చిచ్చు రేగడానికి కారణం ఓ కాంగ్రెస్ నాయకుడని, అతనిపై చర్యలు తీసుకునే ధైర్యం లేక గ్రామ పెద్దలను అరెస్ట్ చేయడం అన్యాయమని తడ ఎస్సై నాగేశ్వరరావుకు వినతిపత్రాన్ని అందచేశారు. దీంతో ఎస్సై విచారణకు తీసుకొచ్చిన ఇద్దరినీ విడిచిపెట్టడంతో గ్రామస్థులు శాంతించారు.
మూఢనమ్మకాలతో క్షుద్ర పూజలు
వింజమూరు, జూలై 14: మూఢనమ్మకాలతో క్షుద్రపూజలు చేసిన సంఘటనలో ఇద్దరిని అదుపులోకి తీసుకుని వారి వద్దనుంచి 1.5 కేజీల ఇత్తడి అమ్మవారి విగ్రహం స్వాధీనం చేసుకున్న సంఘటన వింజమూరు మండలంలో ఆదివారం జరిగింది. కలిగిరి సిఐ ఎవి రమణ తెలిపిన వివరాలు ఇలా ఉన్నాయి. శంఖవరం పంచాయతీ వెంకటాద్రిపాలెంకు చెందిన లేటి శోభన్‌బాబు తండ్రి రమణయ్యకు ఆరోగ్యం సరిగా లేదని పలు ఆస్పత్రులలో చికిత్సలు చేయించినా ఆరోగ్య పరిస్థితి బాగుకాని స్థితిలో చిత్తూరు జిల్లా శ్రీకాళహస్తి సమీపంలోని శ్రీనివాసపురానికి చెందిన కుప్పం బాలయ్య, అతని అసిస్టెంట్ నెల్లూరు జిల్లా సంగంకు చెందిన వేముల ఏడుకొండలును సంప్రదించాడు. మీ తండ్రి ఆరోగ్యం నయం కావాలంటే పొలంలో ఉన్న అమ్మవారి విగ్రహాన్ని తీసుకొచ్చి ఇంటిలో నిత్యపూజలు చేస్తే అష్టైశ్వర్యాలు లభిస్తాయని నమ్మబలికారు. అందుకు 30 వేలు ఖర్చవుతాయనటంతో శోభన్‌బాబు సరేనన్నాడు. అనంతరం బాలయ్య చెన్నై నగరంలోని శ్రీస్వామినాధన్ స్టోర్స్ నుండి ఐదు వేల రూపాయల విలువ చేసే అమ్మవారి ఇత్తడి విగ్రహాన్ని కొనుగోలు చేశాడు. ఈక్రమంలో శనివారం రాత్రి శోభన్‌బాబు కుటుంబీకులు వారి పొలంలో క్షద్రపూజలు చేసి, జంతువులను బలిచ్చారు. విగ్రహం తీసేందుకు గుంట తవ్వారు. మరికొద్ది సేపట్లో అమ్మవారి విగ్రహం వస్తుందని, మీరు దాన్ని చూడకూడదని శోభన్‌బాబు కుటుంబీకులను దూరంగా వెళ్లమన్నాడు. అప్పటికే బాలయ్య తన వెంట తెచ్చిన విగ్రహాన్ని సంచిలో నుండి గుంటలో ఉంచి వారికి చూపించాడు. వారు నిజమని నమ్మి దాన్నితెచ్చి ఇంటికి తెచ్చే సమయంలో విషయం పోలీసులకు తెలిసింది. డిఎస్పీ డి వెంకటేశ్వరరావు తన సిబ్బందితో సంఘటనా స్థలానికి చేరుకుని బాలయ్య అతని అనుచరుడిని అదుపులోకి తీసుకున్నారు. అతని వద్ద ఉన్న అమ్మవారి విగ్రహాన్ని స్వాధీనం చేసుకున్నారు. ఈ మేరకు వారిపై కేసు నమోదు చేసి దర్యాప్తు చేస్తున్నామన్నారు. ఇకనైనా ప్రజలు మూఢనమ్మకాలను విశ్వసించక అప్రమత్తంగా ఉండాలని ఆయన కోరారు.
చోరీ నగలు కుదవ అంగడిలో తాకట్టు
ఆత్మకూరురూరల్, జూలై 14 : ఆత్మకూరు పట్టణంలోని హరిప్రియ హోటల్ యజమాని ఇంటిలో చోరీ చేసిన నిందితుడు మెజిస్ట్రేట్ ముందు చోరీ చేసినట్టు అంగీకరించాడు. నిందితుడు మెజిస్ట్రేట్ ముందు తాను చోరి చేసిన బంగారు ఆభరణాలలో ఆత్మకూరు పట్టణంలో ఓ బంగారు అంగడిలో 2 గాజులు పెట్టి రూ.20 వేలు నగదు తీసుకున్నానని వెల్లడించాడు. ఈ విషయం తెలియగానే పట్టణ పరిధిలోని బంగారు షాపుల యాజమానులు ఉలిక్కిపడ్డారు. వ్యాపార పరంగా ఎవరు బంగారు నగలు తీసుకొచ్చినా కుదువ పెట్టుకోవడం ఆనవాయితీ. హోటల్ యజమాని ఇంటిలో చోరికి గురైన 11 సవర్ల బంగారంలో కేవలం 2 గాజులు మాత్రమే ఆత్మకూరులో తాకట్టు పెట్టినట్లు నిందితుడు వెల్లడించారు. మిగిలిన కొంత బంగారాన్ని నెల్లూరులో, మరికొంత చెన్నైలో పూర్తిగా గోవాలో విక్రయాలు సాగించినట్లు నిందితుడు వెల్లడిస్తున్నాడు. పోలీసులకు సవాల్‌గా మారిన ఈ కేసుకు సంబంధించి సిఐ నిందితున్ని విచారణ కొరకు తమకు అప్పగించాలని మెజిస్ట్రేట్ వద్ద దరఖాస్తు చేసుకున్నట్లు తెలిసింది. నిందితుడిని పోలీసులు స్వాధీనపరుచుకుంటే హోటల్ యజమానికి సంబంధించిన బంగారం బయటకు వచ్చే అవకాశాలు ఉన్నాయని స్థానికులు అంటున్నారు. పట్టణ పరిధిలో రెండు గాజులు కుదువ పెట్టుకున్న వ్యాపారిపై పోలీసులుచర్యలు తీసుకునే అవకాశాలు కన్పిస్తున్నాయి.
ఏదేమైనా ఆత్మకూరు బంగారు షాపుల యాజమానుల మధ్య విషయం చర్చనీయాంశం అయింది.
వృత్తి విద్యాకోర్సులపై
ప్రభుత్వం దృష్టి సారించాలి
- బిజెపి నేత వెంకయ్యనాయుడు పిలుపు -
వెంకటాచలం, జూలై 14: వృత్తి విద్యాకోర్సులపై ప్రభుత్వాలు ప్రత్యేక దృష్టి సారించాలని బిజెపి సీనియర్ నాయకుడు ఎం వెంకయ్యనాయుడు అభిప్రాయపడ్డారు. వెంకటాచలం మండలం స్వర్ణ్భారత్ ట్రస్టులోని థైరెడ్‌లో వృత్తి విద్యలపై శిక్షణ పొందిన విద్యార్థులకు సర్ట్ఫికెట్లను ఆయన ఆదివారం అందజేసారు. ఈ సందర్భంగా ఆయన మాట్లాడుతూ వృత్తి విద్యార్థులలో నైపుణ్యతను గుర్తించి, వాటిపై ప్రత్యేక శిక్షణ ఏర్పాటు చేసేందుకు ప్రత్యేక కేంద్రాలను ప్రభుత్వాలు ఏర్పాటు చేయాలని సూచించారు. తద్వారా దేశంలో, రాష్ట్రంలో నిరుద్యోగ సమస్య తీరుతుందని అభిప్రాయం వ్యక్తం చేసారు. వృత్తి విద్యలపై ప్రతి మండలంలో ఉపాథి శిక్షణా కేంద్రాలను ఏర్పాటు చేయాలని కోరారు. కుల వృత్తులలో యువత నైపుణ్యతను సాధించేందుకు ప్రభుత్వాలతోపాటు స్వచ్చంద సంస్థలు నడుం బిగించాలని ఆయన కోరారు. ఈ సందర్భంగా థెరెడ్‌లో శిక్షణ పొందిన విద్యార్థులకు సర్ట్ఫికెట్లు అందజేసారు. ఈకార్యక్రమంలో సిఇఓ శరత్‌బాబు తదితరులు పాల్గొన్నారు.
ప్రభుత్వ భూములు ఆక్రమిస్తే క్రిమినల్ చర్యలు:జెసి
మనుబోలు, జూలై 14: ప్రభుత్వ భూములు ఆక్రమించిన వారిపై క్రిమినల్ కేసులు నమోదు చేస్తామని జిల్లా జాయింట్ కలెక్టరు లక్ష్మీకాంతం హెచ్చరించారు. ఆదివారం ఎన్నికల నామినేషన్ల పరిశీలన కార్యక్రమం పరిశీలించి తిరిగి వెళ్తున్న సమయంలో స్థానిక రెవెన్యూ అధికారులు ప్రభుత్వ స్థలంలో ఏర్పాటుచేసిన బోర్డును ఆయన పరీశిలించారు. అనంతరం ఆయన మాట్లాడుతూ మండలంలో ఉన్న ప్రభుత్వ భూముల్లో బోర్డులు ఏర్పాటుచేయాలని, బోర్డులను తొలగించిన వారిపై క్రిమినల్ కేసులు నమోదు చేయాలని స్థానిక తహశీల్దారు వెంకటనారాయణమ్మను ఆదేశించారు. కోండూరుసత్రం సమీపంలో ప్రభుత్వ భూమిని ఆక్రమించారని విలేఖరులు ఆయన దృష్టికి తీసురావడంతో స్పందించి భూమిని పరిశీలించి నివేదికను పంపాలని తహశీల్దార్‌ను ఆదేశించారు. ఈ కార్యక్రమంలో ఆయన వెంట ట్రైనీ కలెక్టరు వర్షిణి, స్థానిక ఎంపిడివో హేమలత తదితరులు పాల్గొన్నారు.
ఎన్నికల బరిలో ఎమ్మెస్సీ విద్యార్థి
ఆత్మకూరు రూరల్, జూలై 14 : మండలంలోని చెర్లోయడవల్లి గ్రామ పంచాయతీ బరిలో సిద్ధం సుష్మ అనే ఎమ్మెస్సీ అభ్యర్ధి బరిలో ఉన్నారు. గ్రామంలోని ప్రజలంతా ఈమెను బరిలో నిలపడానికి నిర్ణయించుకున్నారు. ఈ పంచాయతీ పరిధిలో 8 వార్డు మెంబరుగా ఎమ్మెస్సీ చదువుతున్న సిద్ధం సుష్మ పోటీకిదిగారు. ఈ పంచాయతీ పరిధిలో ఎమ్మెస్సీ చదువుకున్న ఈమెకు ప్రభుత్వ ఉద్యోగం రాకపోయేసరికి కుటుంబ సభ్యులు రాజకీయ రంగ ప్రవేశం చేయించినట్టు తెలుస్తోంది. దళిత కుటుంబానికి ఈ చెందిన ఈమె ఉన్నత చదువులు చదివినా ప్రభుత్వ ఉద్యోగం రాకపోయేసరికి రాజకీయ రంగ ప్రవేశం చేయడమే కాక ప్రజలకు సేవ చేయడం మాహాభాగ్యమని సుష్మ వెల్లడించారు. ప్రస్తుతం గ్రూప్-1కు సిద్ధమవుతున్నానని ఆమె వెల్లడించారు. ఈ లోపు గ్రామస్తుల సహకారంతో పోటికి దిగినట్లు వెల్లడించారు. కుటుంబ సభ్యులు ఆర్థిక స్థోమత లేకున్ననూ ఆమె చదువుకు తగినంత సహకారం అందిస్తామని గ్రామస్థులు వెల్లడించారు.
ప్రత్యేక రాష్ట్రం
వచ్చే ప్రసక్తే లేదు
నెల్లూరుసిటీ, జూలై 14: కాంగ్రెస్ పార్టీ కోర్ కమిటీలో కూడా ప్రత్యేక తెలంగాణ మీద చర్చించలేదని, సిడబ్ల్యుసి సమావేశంలో కూడా ప్రత్యేక రాష్ట్రం గురించి చర్చకు రాదని నెల్లూరురూరల్ ఎమ్మెల్యే ఆనం వివేకానందరెడ్డి తెలిపారు. ఆదివారం పద్మావతి ఫంక్షన్‌హాల్లో సమైక్యాంధ్ర విద్యార్థి జెఎసి ఆధ్వర్యంలో ఏర్పాటు చేసిన సభలో ఆయన మాట్లాడుతూ టిఆర్‌ఎస్ అధ్యక్షుడు చంద్రశేఖర్ రాజకీయ లబ్ధి కోసమే ప్రత్యేక రాష్ట్రాన్ని కోరుతున్నారని తెలిపారు. ప్రత్యేక రాష్ట్రం వస్తే కెసిఆర్‌కు సిఎం కూర్చీ, ఆయన కుమారుడుకి డిప్యూటీ సిఎం, కూతురుకి ఢిల్లీలో పదవి, అల్లుడికి కీలక మంత్రి పదవులు కట్టబెట్టాలని చూస్తున్నారన్నారు. ఇందుకోసం రాష్ట్రంలో మూడు ప్రాంతాల మధ్య ధ్వేషాలను రెచ్చగొడుతున్నారని తెలిపారు. రాష్ట్రాన్ని విడదీసే దానికి కాంగ్రెస్ పార్టీ ఎట్టి పరిస్థితులో మద్దతు ఇవ్వదన్నారు. సమైక్యాంధ్రకు మద్దతుగా అన్ని పార్టీలు ఐక్యంగా ఉండి పోరాటం చేయాలని ఆయన పిలుపు నిచ్చారు. ప్రత్యేక రాష్ట్రం పేరుతో ఓట్లను దండుకొనేందుకు బిజెపి ప్రయత్నిస్తోందన్నారు. ఆ పార్టీ అడ్రస్సు లేని పార్టీ అని తెలిపారు. చిన్న రాష్టల్ర వల్ల నక్సలిజం పెరిగిపోవడం తప్ప అభివృద్ధి ఉండదన్నారు. నెల్లూరుసిటీ ఎమ్మెల్యే ముంగమూరు శ్రీ్ధర్‌కృష్ణారెడ్డి మాట్లాడుతూ పొట్టి శ్రీరాములు త్యాగం ఫలితంగా వచ్చి ఆంధ్రరాష్టన్న్రి విడగొడితే ఎట్టి పరిస్థితులో సహించేది లేదన్నారు. ఆంధ్ర రాష్ట్రాన్ని సమైక్యంగా ఉంచేందుకు అన్ని పార్టీలు ఒక తాటిపై నడవాలని పిలుపునిచ్చారు. ఆనం వివేకానందరెడ్డి తండ్రి ఆనం వెంకటరెడ్డి కూడా సమైక్యాంధ్ర కోసం పోరాటం చేశారని గుర్తుచేశారు. రాష్ట్రాన్ని విభజించాలని చూస్తే ఉద్యమాలను తీవ్రతరం చేస్తామని హెచ్చరించారు. ఈ కార్యక్రమంలో తెలుగుదేశం పార్టీ నాయకులు కోటంరెడ్డి శ్రీనివాసులురెడ్డి, యర్రంరెడ్డి గోవర్దన్‌రెడ్డి, ననే్నసాహెబ్, వేనాటి చంద్రశేఖర్‌రెడ్డి, సమైక్యాంధ్ర విద్యార్థి జెఎసి కన్వీనర్ డివి కృష్ణయాదవ్ తదతరులు పాల్గొన్నారు.
నామినేషన్ల పరిశీలన పూర్తి
సర్పంచ్ నామినేషన్లు - 74
వార్డు మెంబర్లు- 520 తిరస్కరణ
నెల్లూరుసిటీ, జూలై 14: జిల్లా వ్యాప్తంగా సర్పంచ్, వార్డు మెంబర్లకు నామినేషన్ల పరిశీలన ఆదివారం జరిగింది. మొత్తం 931 పంచాయతీలకు గాను 927 పంచాయతీలకు అభ్యర్థులు నామిషన్లు దాఖలు చేశారు. 4 పంచాయతీలకు వివిధ కారణల వల్ల ఎవరు కూడా నామినేషన్లు దాఖలు చేయలేదు. సర్పంచ్ అభ్యర్థులుగా 4670 మంది అభ్యర్థులుగా నామినేషన్లు దాఖలు చేశారు. 8834 వార్డులకు గాను 22776 మంది నామినేషన్లు దాఖలు చేశారు. ఆదివారం రాత్రి వరకు నామిషనేషన్ల పరిశీలన ప్రక్రియ కొనసాగింది. అందులో వివిధ కారణాలతో సర్పంచ్ నామినేషన్లు 74 నామినేషన్లను తిరస్కరించారు. వార్డులకు దాఖలైన 22776 మంది నామినేషన్లు పరిశీలించి వాటిలో 520 తిరస్కరించారు.
డివిజన్ల వారిగా వివరాలిలావున్నాయ.
కావలి డివిజన్‌లో సర్పంచ్ అభ్యర్థులుగా నలుగురు, వార్డు మెంబర్లు -62
ఆత్మకూరు డివిజన్‌లో సర్పంచ్‌కు 13- వార్డుమెంబర్లు-93, నెల్లూరు డివిజన్‌లో సర్పంచ్‌కు 27, వార్డు మెంబర్లకు 171, గూడూరు డివిజన్‌లో సర్పంచ్ 14, వార్డు మెంబర్లకు 123, నాయుడుపేట డివిజన్‌లో సర్పంచ్‌కు 16, వార్డు మెంబర్లు -70 నామినేషన్లు తిరస్కరించారు.