‘అడ్డా’ విజయం ఉత్సాహాన్నిచ్చింది

శ్రీనాగ్ కార్పొరేషన్‌పై తాము నిర్మించిన మూడవ చిత్రం ‘అడ్డా’ విజయవంతంగా ప్రదర్శింపబడుతోందని, సూపర్ హిట్ రేంజ్‌లో అన్ని థియేటర్లలో హౌస్‌ఫుల్ కలెక్షన్లతో సాగుతోందని, రెండో వారంలో కూడా ఆదరణ తగ్గలేదని, ఈ విజయం తమకు నూతన ఉత్సాహాన్ని అందిస్తోందని నిర్మాత చింతలపూడి శ్రీనివాసరావు తెలిపారు. సుశాంత్, శాన్వి జంటగా జి.ఎస్.కార్తీక్‌రెడ్డి దర్శకత్వంలో రూపొందిన ‘అడ్డా’ చిత్రం విడుదలైన సంగతి తెలిసిందే. చింతలపూడి శ్రీనివాసరావు, ఎ.నాగసుశీల నిర్మాతలుగా వ్యవహరించిన ఈ చిత్రం విజయంపై నిర్మాత ఆనందం వ్యక్తంచేశారు. ఇంకా ఆయన పలు విషయాలు చెబుతూ అడ్డా చిత్రాన్ని ఇంత పెద్ద విజయం చేసినందుకు ప్రేక్షకులకు ధన్యవాదాలు తెలుపుతున్నానని, హిట్ అవుతుందని అనుకున్నా ఇంత పెద్ద విజయం లభిస్తుందని ఊహించలేదని, శ్రీనాగ్ కార్పొరేషన్ ఈ చిత్రంతో విజయాల హ్యాట్రిక్ కొట్టిందని తెలిపారు. కాళిదాస్, కరెంట్ చిత్రాల వరుసలోనే ఈ చిత్రం కూడా కథాప్రాముఖ్యతతో సెంటిమెంట్‌తో విజయం సాధించిందని, కథకు అనుగుణంగానే ఈ చిత్రానికి ఆ పేరు నిర్ణయించామని, సుశాంత్ నటనకి అద్భుతమైన రెస్పాన్స్ లభిస్తోందని ఆయన వివరించారు. రెండవ హిట్‌తో శాన్వి ఈ చిత్ర కథానాయికగా మరోసారి ప్రేక్షకులకు దగ్గరైందని, కార్తీక్‌రెడ్డి కథా, కథనాలు, మాటలు థియేటర్‌లో పేలుతున్నాయని ఆయన వివరించారు. అక్కినేని నాగేశ్వరరావు ఓసారి పెళ్లికి వెళుతూ కాబోయే జంట కలకాలం కలిసి ఉంటారా లేదా అన్న అనుమానంతో దీవించడానికే భయపడ్డానని చెప్పడంతో ఈ చిత్ర కథకు బీజం పడిందని, అదే కథను మళ్లీ కార్తీక్‌రెడ్డి తీసుకురావడంతో సెంటిమెంట్ పరంగా ఈ చిత్రాన్ని నిర్మించామని, ఓ చిన్న ఆలోచన ఇంత విజయాన్ని అందిస్తుందని అనుకోలేదని ఆయన తెలిపారు. యూత్‌కు బాగా దగ్గరైన ఈ కథ ఫ్యామిలీ ఆడియన్స్‌కు కూడా నచ్చుతోందని, రెండవ వారం ప్రదర్శింపబడుతున్న అన్ని థియేటర్లలో ఈ చిత్రం అద్భుతమైన ఆదరణతో సాగుతోందని, కొన్ని కేంద్రాలలో బంద్ కారణంగా కొంత నష్టం అయినా, థియేటర్లు మాత్రం సాగుతున్నాయని తెలిపారు. సుశాంత్ అన్ని ఎమోషన్స్ పండించగలడని ఈ చిత్రంలో మరోసారి ప్రూవ్ అయిందని, చిత్రానికి సంబంధించిన ఆడియో వేడుకలో అక్కినేని నాగేశ్వరరావు, నాగార్జున, నాగచైతన్య, సుమంత్ వంటివారు హిట్ అవుతుందని చెప్పినమాట నేడు నిజమైందని, వారు దీవెనలు అందించి విజయవంతం చేసినందుకు కృతజ్ఞతలు తెలుపుతున్నానని ఆయన వివరించారు. ఈనెల 29న నాగార్జున జన్మదినోత్సవ సందర్భంగా ఆయన శుభాకాంక్షలు చెబుతున్నామని, శ్రీనాగ్ కార్పొరేషన్ పతాకంపై అందరు హీరోలతో సినిమాలు నిర్మించడానికి సిద్ధమవుతున్నామని, ఇకనుంచి ఎటువంటి గ్యాప్ తీసుకోకుండా పెద్ద దర్శకులతో చిత్రాలు చేయడానికి సన్నాహాలు చేస్తున్నామని, త్వరలో సుమంత్‌తో ఓ ద్విభాషా చిత్రానికి చర్చలు జరుగుతున్నాయని, అదే విధంగా పెద్ద దర్శకులతో కూడా ప్రపోజల్స్ సాగుతున్నాయని ఆయన వివరించారు. ‘అడ్డా’ చిత్రానికి విజయాన్ని అందించిన అందరికీ ఈ సందర్భంగా తాను కృతజ్ఞతలు తెలుపుతున్నానని ఆయన అన్నారు.