కిరణ్, అక్షయ జంటగా ఆర్.కె ఫిలిమ్స్ ఫ్యాక్టరీస్ పతాకంపై రాజ్‌కుమార్ స్వీయ దర్శకత్వంలో నిర్మిస్తున్న చిత్రం ‘నన్ను దోచుకొందువటే’. ఈ చిత్రానికి సంబంధించిన ప్రారంభోత్సవ కార్యక్రమం హైదరాబాద్ అన్నపూర్ణ స్టూడియోలో శనివారం ఉదయం జరిగింది. ముహూర్తపు సన్నివేశంపై ఉప ముఖ్యమంత్రి దామోదర రాజనర్సింహ క్లాప్ ఇవ్వగా విజయానందరెడ్డి కెమెరా స్విచ్ ఆన్ చేశారు. వి.సాగర్ గౌరవ దర్శకత్వం వహించారు. ఈ సందర్భంగా ఏర్పాటుచేసిన పాత్రికేయుల సమావేశంలో దర్శక, నిర్మాత రాజ్‌కుమార్ మాట్లాడుతూ ప్రేమ నేపథ్యంలో సాగే ఈ చిత్రంలో యువతకు కావలసిన అన్ని మసాలాలు ఉంటాయని, సినారె రచించిన తొలి పాట పల్లవిని ఈ సినిమాకి పేరుగా ఆయన అనుమతితోనే పెట్టామని, నేటినుండి రెగ్యులర్ షూటింగ్ జరగనుందని తెలిపారు. పాటల షూటింగ్‌కు విదేశాలకు వెళతామని, ఆడియో దీపావళికి, సినిమాను డిసెంబర్‌లో విడుదల చేయడానికి సన్నాహాలు చేస్తున్నామని ఆయన వివరించారు. కార్యక్రమంలో శ్రీ వెంకట్, కిరణ్, అక్షయ తదితరులు పాల్గొన్నారు. సుమన్, బాబుమోహన్, షఫి, జీవా, అంబటిశ్రీను, తా.రమేష్, ఆహుతిప్రసాద్, ధర్మవరపు, ఉత్తేజ్, తెలంగాణా శకుంతల, సుధారాణి, రజని, కళ్యాణ్, స్వర్ణ తదితరులు నటిస్తున్న ఈ చిత్రానికి మాటలు: ధరణికోట శివరామ్‌ప్రసాద్, పాటలు: సంజయ్‌గాంధీ, రాజ్‌కుమార్, సంగీతం: శ్రీ వెంకట్, కెమెరా: జగదీష్, రచన, నిర్మాణం, దర్శకత్వం: రాజ్‌కుమార్.
హీరో హీరోయన్లపై క్లాప్ ఇస్తున్న ఉపముఖ్యమంత్రి దామోదర రాజనర్సింహ