జాతీయ జట్టులోకి కృష్ణా ఆర్చర్లు

విజయవాడ , సెప్టెంబర్ 3: భారత ఆర్చరీ జట్టులో కృష్ణాజిల్లా నుండి ముగ్గురు ఆర్చర్లు చోటు సంపాదించారు. ఈ నెల 1 నుండి 3వ తేదీ వరకు మహారాష్టల్రోని పుణె ఆర్మీ స్పోర్ట్స్ ఇన్‌స్టిట్యూట్‌లో జరిగిన భారత జట్టు ఎంపిక పోటీల్లో ఓల్గా ఆర్చరీ అకాడమీకి చెందిన ఎం చిరంజీవి ఫణిభూషణరావు, జిల్లాకు చెందిన వి జ్యోతి సురేఖ, సిహెచ్ జిజ్ఞాస్ భారత జట్టుకు ఎంపికయ్యారు. చిరంజీవి ప్రథమ స్థానం, జిజ్ఞాస్ ద్వితీయ స్థానం సాధించి భారత బాలుర జట్టులో స్థానం పొందినట్లు రాష్ట్ర ఆర్చరీ సంఘ కార్యనిర్వాహక కార్యదర్శి చెరుకూరి సత్యనారాయణ తెలిపారు. జ్యోతి సురేఖ ప్రథమ స్థానం సాధించి బాలికల భారత జట్టులో చోటు సాధించింది. వీరు అక్టోబర్ 13 నుండి 20వ తేదీ వరకు చైనాలో జరిగే ప్రపంచ యూత్ ఆర్చరీ చాంపియన్‌షిప్‌లో భారత జట్టుకు ప్రాతినిధ్యం వహించనున్నట్లు సత్యనారాయణ తెలిపారు.