సెమీస్‌లో సెరెనా

న్యూయార్క్, సెప్టెంబర్ 4: ప్రపంచ నంబర్‌వన్, అమెరికా స్టార్ సెరెనా విలియమ్స్ స్వదేశంలో జరుగుతున్న యుఎస్ ఓపెన్ గ్రాండ్‌శ్లామ్‌లో సెమీ ఫైనల్స్‌కు దూసుకెళ్లింది. టోర్నమెంట్ ఆరంభం నుంచి దూకుడుగా ఆడుతున్న ఆమె మహిళల సింగిల్స్ క్వార్టర్ ఫైనల్స్‌లో కార్లా సౌరెజ్ నవరోపై 6-0, 6-0 తేడాతో ఎలాంటి కష్టం లేకుండా గెలుపొందింది. గట్టిపోటీనిస్తుందనుకున్న కార్లా ఎలాంటి ప్రతిఘటన లేకుండానే దాసోహం అనడం సెరెనా విజృంభణకు తార్కాణం. చైనా క్రీడాకారిణి, ఐదో సీడ్ నాలీ కూడా సెమీస్ చేరింది. ఆమె క్వార్టర్ ఫైనల్స్‌లో ఎకతెరిన మకరొవాను 6-4, 6-7, 6-2 తేడాతో ఓడించింది. రెండో ర్యాంకర్ విక్టోరియా అజరెన్కా 4-6, 6-3, 6-4 స్కోరుతో అనా ఇవానొవిచ్‌పై గెలుపొంది సెమీస్‌లో అడుగుపెట్టింది.