నాకే సంతృప్తిగా లేదు ప్రజలకేం చెబుతాం

విశాఖపట్నం, ఫిబ్రవరి 21: సీమాంధ్ర ప్రాంతానికి కేంద్రం ఇచ్చిన ప్యాకేజీ తనకే సంతృప్తిగా లేదని, ఇక జనానికేం చెపుతామని పిసిసి అధ్యక్షుడు బొత్స సత్యనారాయణ అన్నారు. విశాఖలో శుక్రవారం ఆయన విలేఖరులతో మాట్లాడుతూ ఈ ప్యాకేజీల గురించి మొదటి నుంచి పోరాడితే, ఇంకా మెరుగైన ఫలితాలు సాధించి ఉండేవారమన్నారు. అప్పుడు ఎందుకు అడగలేదని విలేఖరులు ప్రశ్నించగా, ఆ ప్రభావం ఉద్యమంపై పడుతుందన్న ఆలోచనతో ఆగిపోయామన్నారు. అయితే సీమాంధ్రకు ఇచ్చిన ప్యాకేజీ గుడ్డిలో మెల్ల అని వ్యాఖ్యానించారు. ఈ ప్యాకేజీ వల్ల సీమాంధ్ర కొంతవరకూ అభివృద్ధి చెందుతుందన్నారు. సీమాంధ్రలో దెబ్బతిన్న కాంగ్రెస్ పార్టీని మళ్లీ బతికించుకునేందుకే తాను ఇక్కడికి వచ్చానని బొత్స తెలియచేశారు. రాష్ట్ర విభజన కేవలం కాంగ్రెస్ పార్టీ నిర్ణయం కాదని, అన్ని పార్టీలూ ఇందుకు మద్దతు తెలిపాయన్నారు.