ఉత్తమ నటిగా జాతీయ అవార్డులు కైవసం చేసుకున్న తారలు గ్లామర్ పాత్రలకు చాలా దూరంగా వుంటారని అందరూ భావిస్తుంటారు. కానీ ప్రియమణి మాత్రం అందుకు విరుద్ధంగా అన్ని రకాల పాత్రలు చేసి అందర్నీ మెప్పించింది. వైవిధ్యమున్న పాత్రలే కాదు, గ్లామర్‌ని యువతరానికి రుచిచూపించి కైపెక్కించింది. తెలుగు, తమిళ భాషల్లో ఇలా అన్ని రకాల పాత్రలు చేసి తానేంటో నిరూపించుకుంది. అయితే ప్రియమణికి ఇప్పుడు తెలుగు, తమిళ భాషల్లో అవకాశాలే లేకుండా పోయాయి. జగపతిబాబుతో చేసిన ‘క్షేత్రం’ తర్వాత ఇప్పటి వరకు ఒక్క చిత్రమూ రాలేదు. ఇలా ఎందుకు జరిగిందోనన్న విషయాన్ని పక్కనపెడితే తాజాగా మళ్లీ ఓ హారర్ సినిమాతో తెరపైకి వస్తుందట. అదీ..తెలుగు, తమిళ, మలయాళ భాషల్లో ఒకేసారి విడుదలవుతోందట. పొన్ కుమరన్ అనే దర్శకుడు ‘చారులత’ అనే చిత్రాన్ని తెరకెక్కిస్తున్నారు. ఈ చిత్రంలో స్కంధ కథానాయకుడు. ప్రియమణి నాయిక. ఈ చిత్రం తర్వాత తెలుగులో మళ్లీ అవకాశాలు వస్తాయన్న ధీమాను ప్రియమణి వ్యక్తం చేస్తోంది.
...........................
కల నిజమాయె..!
బాలీవుడ్ భామ దీపికా పడుకొనె కల నిజమైందట. ఆ కల ఎలా నిజమైందో తెలుసుకుందామని దీపికను కదిలిస్తే...‘అగ్ర నటులతో కలిసి నటించాలన్న నా కల ఇన్నాళ్లకు నిజమైంది. వాళ్లెవరో కాదు...అమితాబ్‌బచ్చన్, రజనీకాంత్. వాళ్లతో నటించాలని ఎన్నో కలలుగన్నాను. ఆ కలలు ఇవాళ నిజమైనందుకు ఎంతో గర్వంగా ఫీలవుతున్నాను. నా కెరీర్‌లో ఇది గొప్ప విజయంగా భావిస్తాను. అమితాబ్‌బచ్చన్‌తో ‘ఆ రక్షణ్’ చిత్రంలో నటించిన నేను రజనీకాంత్‌తో ‘కొచ్చడయాన్’లో నటిస్తున్నాను. ఈ చిత్రానికి రజనీ కూతురు సౌందర్య దర్శకత్వం వహిస్తున్నారు. భారీ అంచనాలతో తెరకెక్కుతున్న ఈ చిత్రంపై అంత కంటే భారీ అంచనాలే వున్నాయి. ఈ చిత్రం గొప్ప విజయం సాధిస్తుందన్న నమ్మకం నాకుంది’’అంటూ ఎంతో ఆనందంగా తన కల గురించి చెప్పుకొచ్చింది దీపికా!!
...............................
దేనికైనా..రెడీ!
అందాలతార హన్సిక ఇప్పుడు మళ్లీ బిజీ అవుతోంది. తెలుగు, తమిళ భాషల్లో నటిస్తూ గ్లామర్ భామగా మంచి గుర్తింపును తెచ్చుకున్న హన్సికకు గత కొంత కాలంగా టాలీవుడ్‌లో అవకాశాలు లేకుండా పోయాయి. ఇప్పుడిప్పుడే మళ్లీ అవకాశాలు ఆమెను వరిస్తున్నాయి. మంచు విష్ణుతో ‘దేనికైనా రెడీ’ చిత్రంతో పాటు నాగచైతన్యతో ఓ చిత్రంలో నటిస్తున్నట్లు వార్తలు వినిపిస్తున్నాయి. మరో వైపు తమిళసీమలో కూడా మంచి అవకాశాలు వస్తున్నాయి. అక్కడ అగ్రహీరో సూర్య చిత్రంలో ఓ ప్రత్యేక పాత్ర చేసే అవకాశం వచ్చినట్లు చెప్పుకుంటున్నారు. ఎంతో కాలంగా గ్లామర్ పాత్రలు చేస్తున్నప్పటికీ రావలిసిన గుర్తింపు హన్సికకు రాలేదు. కారణాలేమిటో హన్సిక ఇంత కాలానికి గ్రహించినట్లుంది. ‘ఇక దేనికైనా రెడీ’ అంటోంది. చూద్దాం..హన్సికకు ఈసారైనా కలిసివస్తుందో లేదో...!!