తొలిసారిగా నాగార్జున నటిస్తున్న సోషియో ఫాంటసీ చిత్రం ‘డమరుకం’. ఆర్.ఆర్ మూవీ మేకర్స్ పతాకంపై డా.వెంకట్ ఈ చిత్రాన్ని శ్రీనివాసరెడ్డి దర్శకత్వంలో నిర్మిస్తున్నారు. షూటింగ్ పూర్తిచేసుకుని గ్రాఫిక్స్ కార్యక్రమాలు జరుపుకుంటోందీ చిత్రం. ఈ చిత్రంలోని పాటలను ఈనెల 10న హైదరాబాద్ హైటెక్ సిటీలో విడుదల చేయనున్నారు. ఈ సందర్భంగా హీరో నాగార్జున మాట్లాడుతూ తొలిసారిగా తాను చేస్తున్న సోషియో ఫాంటసీ చిత్రాన్ని నిర్మాత రాజీపడకుండా నిర్మించారని, దర్శకుడు కథను అద్భుతంగా తీర్చిదిద్ది, డిఫరెంట్ సినిమాగా తీసుకువచ్చారని, తప్పక విజయవంతమవుతుందన్న నమ్మకం వుందని తెలిపారు. నాగార్జున కెరీర్‌లోనే హై బడ్జెట్ చిత్రంగా నిర్మించిన ఈ సినిమా తమ సంస్థకే ప్రెస్టేజియస్ మూవీ అవుతుందని నిర్మాత వెంకట్ అన్నారు. నాగార్జున కెరీర్‌లోనే ల్యాండ్‌మార్క్ చిత్రంగా ఆర్.ఆర్ మూవీ మేకర్స్ పతాకంపై ఇంత పెద్ద చిత్రానికి దర్శకత్వం వహించడం అదృష్టంగా భావిస్తున్నానని, అన్ని కార్యక్రమాలు పూర్తిచేసి అక్టోబర్ 12న చిత్రాన్ని విడుదల చేయడానికి సన్నాహాలు చేస్తున్నామని దర్శకుడు శ్రీనివాసరెడ్డి తెలిపారు. అనుష్క కథానాయికగా నటిస్తున్న ఈ చిత్రానికి కెమెరా: చోటా కె.నాయుడు, సంగీతం: దేవీశ్రీప్రసాద్, సమర్పణ: కె.అచ్చిరెడ్డి, సహ నిర్మాత: వి.సురేష్‌రెడ్డి, నిర్మాత: డా.వెంకట్, స్క్రీన్‌ప్లే, దర్శకత్వం: శ్రీనివాసరెడ్డి.