గతంలో సంచలనం, హాసిని వంటి చిత్రాలను నిర్మించిన కమల్ పిక్చర్స్ సంస్థ తాజాగా నిర్మిస్తున్న చిత్రం ‘బ్యాండ్ బాలు’. చింతలపూడి వెంకట్ దర్శకత్వంలో బి.కమలాకర్‌రెడ్డి నిర్మిస్తున్న ఈ చిత్రంలో కమలాకర్, కామ్నాజఠ్మలానీ జంటగా నటిస్తున్నారు. ఈ చిత్రానికి సంబంధించిన ప్రారంభోత్సవ సన్నివేశం శుక్రవారం ఉదయం హైదరాబాద్ రామానాయుడు స్టూడియోలో చిత్రీకరించారు. తొలి షాట్‌పై మురళీమోహన్ క్లాప్ ఇవ్వగా, తమ్మారెడ్డి భరద్వాజ కెమెరా స్విచ్చాన్ చేశారు. చిన్నికృష్ణ గౌరవ దర్శకత్వం నిర్వహించారు. ఈ సందర్భంగా ఏర్పాటుచేసిన పాత్రికేయుల సమావేశంలో చిత్ర దర్శకుడు చింతలపూడి వెంకట్ మాట్లాడుతూ బ్యాండ్ మేళం మోగించే ఓ పల్లెటూరి కుర్రాడు పట్నం వచ్చి ఓ పెద్ద సినిమా హీరోయిన్‌తో ప్రేమలో పడతాడన్న విషయాన్ని కామెడీ ఎంటర్‌టైనర్‌గా చెబుతున్నామని, చివరికి ఏం జరిగింది అనే విషయాన్ని సందేశాత్మకంగా నిర్మిస్తున్నామని, మదర్ సెంటిమెంట్‌తో నిర్మిస్తున్న ఈ సినిమా మ్యూజికల్‌గా కూడా ప్రేక్షకులను అలరిస్తుందని తెలిపారు. హీరో, నిర్మాత బి.కమలాకర్‌రెడ్డి మాట్లాడుతూ తాను హీరోగా నటిస్తున్న ఈ చిత్రం ఐదవదని, గత చిత్రాలలాగే ఈ చిత్రం కూడా ప్రేక్షకులకు సంతృప్తినిస్తుందనితెలిపారు. కార్యక్రమంలో సుబ్బారెడ్డి, బెనర్జీ, బూచేపల్లి వెంకాయమ్మ, కథారచయిత రాజ్‌కళింగ తదితరులు పాల్గొన్నారు. ఈ చిత్రానికి సంగీతం: ఎస్.చిన్న, పాటలు: భువనచంద్ర, భాస్కరభట్ల, నిర్మాత: బి.కమలాకర్ రెడ్డి, దర్శకత్వం: చింతలపూడి వెంకట్.