దేవదాసు పేరుతో మనకు అనేక చిత్రాలు పరిచయం ఉన్నాయి. ఇప్పుడు తనీష్, చాందినీ జంటగా వి.ఎస్.ఆర్ ప్రొడక్షన్స్ పతాకంపై మరొక దేవదాసును చూడనున్నాం. శ్రీనివాస్ గుండ్రెడ్డి దర్శకత్వంలో వి.ఎస్.రామిరెడ్డి నిర్మిస్తున్న చిత్రం పేరు ‘దేవదాస్ స్టైల్ మార్చాడు’. ఈ చిత్రానికి సంబంధించిన ప్రారంభోత్సవ సన్నివేశం శుక్రవారం ఉదయం హైదరాబాద్ అన్నపూర్ణ స్టూడియోలో చిత్రీకరించారు. ముహూర్త సన్నివేశంపై రామకృష్ణారెడ్డి క్లాప్ ఇవ్వగా ప్రసన్నకుమార్ కెమెరా స్విచ్చాన్ చేశారు. తొలి సన్నివేశానికి సాగర్ గౌరవ దర్శకత్వం వహించారు. ఈ సందర్భంగా ఏర్పాటుచేసిన పాత్రికేయుల సమావేశంలో చిత్ర కథానాయకుడు తనీష్ మాట్లాడుతూ తన పుట్టినరోజు సందర్భంగా ప్రారంభమవుతున్న ఈ కార్యక్రమాన్ని చాలా అట్టహాసంగా నిర్వహించారని, తన గత చిత్రాలకు పోలిక లేకుండా ఈ సినిమా లవ్ ఎంటర్‌టైన్‌మెంట్‌తో ప్రేక్షకులను అలరిస్తుందని తెలిపారు. దేవదాస్ అంటేనే చంద్రముఖి ఉంటుందని, ఈ దేవదాస్‌కు మాత్రం ఇద్దరు చంద్రముఖిలు ఉన్నారని, పూర్తి హాస్యభరితంగా నిర్మిస్తున్నామని తెలిపారు. ఈ చిత్రానికి సంగీతం: గణ, పాటలు: జయసూర్య, రమేష్, సదాచంద్ర, కెమెరా: జి.ఎస్.చక్రవర్తిరెడ్డి, నిర్మాత: వి.ఎస్.రామిరెడ్డి, కథ, మాటలు, స్క్రీన్‌ప్లే, దర్శకత్వం: శ్రీనివాస్ గుండ్రెడ్డి.