కమర్షియల్ హీరో చిత్రానికి యు/ఏ సర్టి ఫికెట్ లభించడం సంతోషకరంగా వుందని, చిత్రంలో ఒక్క కట్ కూడా లేకుండా సెన్సార్ అయిందని, పవన్‌కళ్యాణ్ నటన హైలెట్‌గా సాగే ఈ చిత్రం అందరి అంచనాలకు తగ్గట్టుగా రూపొందిందని చిత్ర నిర్మాత డి.వి.వి.దానయ్య తెలిపారు. యూనివర్సల్ మీడియా పతాకంపై పూరీ జగన్నాథ్, పవన్‌కళ్యాణ్‌ల మలి కలయికలో రూపొందిన చిత్రం ‘కెమెరామెన్ గంగతో రాంబాబు’. ఈ చిత్రం సెన్సార్ కార్యక్రమాలు పూర్తిచేసుకుని ఈనెల 18న విడుదలకు సిద్ధమైంది. ఈ సందర్భంగా నిర్మాత మాట్లాడుతూ పై విషయాలు తెలిపారు. దర్శకుడు పూరీ జగన్నాథ్ మాట్లాడుతూ ఆడియో ఇప్పటికే హిట్ అయిందని, తెలుగు సినిమా చరిత్రలోనే ఎక్కువ థియేటర్లలో విడుదలవుతున్న పవన్‌కళ్యాణ్ చిత్రంగా ఈ చిత్రం రికార్డు సృష్టిస్తుందనీ, పవన్‌కళ్యాణ్ క్లైమాక్స్‌లో చెప్పిన డైలాగులకు మంచి ఆదరణ లభించనుందని, హీరోకి తగిన విధంగా పెద్ద రేంజ్‌లో చిత్రం విజయం సాధించనుందని ఆయన వివరించారు. తమన్నా, గాబ్రియేలా, ప్రకాష్‌రాజ్, కోట శ్రీనివాసరావు, బ్రహ్మానందం తదితరులు నటిస్తున్న ఈ చిత్రానికి సంగీతం: మణిశర్మ, కెమెరా: శ్యామ్ కె.నాయుడు, నిర్మాత: డి.వి.వి. దానయ్య, కథ, మాటలు, స్క్రీన్‌ప్లే, దర్శకత్వం: పూరీ జగన్నాథ్.